ചോക്ലേറ്റ് ഈസ്റ്റർ ബ്രെഡ്

ഒരു പാത്രത്തിൽ 150 g ഇളംചൂടുള്ള പാലും, 60 g പഞ്ചസാരയും, 7 g ഇൻസ്റ്റൻ്റ് ഡ്രൈ യീസ്റ്റും ചേർത്ത് നന്നായി ഇളക്കുക.

മറ്റൊരു വലിയ പാത്രത്തിൽ 350–380 g മൈദയും, തയ്യാറാക്കി വെച്ച പാൽ മിശ്രിതവും, ½ tsp ഉപ്പും, ഒരു മുട്ടയും, ഒരു മുട്ടയുടെ മഞ്ഞക്കരുവും ചേർക്കുക. എല്ലാം കൂടി യോജിപ്പിച്ച് ഒട്ടുന്ന പരുവത്തിലുള്ള മാവാക്കി മാറ്റിയ ശേഷം മൂടിവെച്ച് 20 മിനിറ്റ് റെസ്റ്റ് ചെയ്യാൻ വെക്കുക.

ഇനി ഇതിലേക്ക് നല്ല സോഫ്റ്റായ 60 g ബട്ടറും, 1 tsp വാനില എസ്സെൻസും ചേർക്കുക. മാവ് നല്ല മയവും ഇലാസ്തികതയുമുള്ളതാകുന്നതുവരെ 10–15 മിനിറ്റ് നന്നായി കുഴച്ചെടുക്കണം. ഇതൊരു ഉരുളയാക്കി മാറ്റി, ഒരു പാത്രത്തിൽ വെച്ച് മൂടി 1½–2 മണിക്കൂർ ചൂടുള്ള ഒരിടത്ത് വലിപ്പം ഇരട്ടിയാകാൻ വെക്കുക.

ഒരു ചെറിയ ബൗളിൽ 60 g ഉരുക്കിയ ബട്ടറും, 50 g ഡാർക്ക് കൊക്കോ പൗഡറും, 50 g പൊടിച്ച പഞ്ചസാരയും ചേർത്ത് നല്ല കട്ടിയുള്ള പേസ്റ്റ് രൂപത്തിൽ മിക്സ് ചെയ്തെടുക്കുക.

പൊങ്ങി വന്ന മാവിലെ വായു അമർത്തി കളഞ്ഞ ശേഷം, അതൊരു വലിയ ദീർഘചതുരാകൃതിയിൽ (rectangle) പരത്തിയെടുക്കുക. ഇതിനു മുകളിൽ ചോക്ലേറ്റ് ഫില്ലിംഗ് ഒരേപോലെ തേച്ചുപിടിപ്പിക്കാം. ഇനി ഇത് നല്ല മുറുക്കത്തിൽ ഒരു റോൾ പോലെ ചുരുട്ടിയെടുക്കുക. ശേഷം നീളത്തിൽ 3 തുല്യ ഭാഗങ്ങളായി മുറിക്കുക.

മുറിച്ച വശങ്ങളിലെ ലെയറുകൾ മുകളിലേക്ക് കാണുന്ന രീതിയിൽ മൂന്ന് ഭാഗങ്ങളും ചേർത്ത് മുടി പിന്നുന്നതുപോലെ പിന്നിയെടുക്കുക. ശേഷം നടുവിൽ വെണ്ണ പുരട്ടിയ 10 cm (4 in) റിംഗ് വെച്ച്, അതിനു ചുറ്റും ഒരു റീത്ത് പോലെ വളച്ച് രണ്ടറ്റങ്ങളും തമ്മിൽ നന്നായി ഒട്ടിക്കുക. ബേക്കിംഗ് പേപ്പർ വിരിച്ച ട്രേയിലേക്ക് മാറ്റി, തുണി കൊണ്ട് മൂടി 40–45 മിനിറ്റ് വീണ്ടും പൊങ്ങാൻ വെക്കുക.

180°C (350°F) പ്രീഹീറ്റ് ചെയ്ത അവ്നിൽ 25–30 മിനിറ്റ് നല്ല ഗോൾഡൻ ബ്രൗൺ നിറമാകുന്നതുവരെ ബേക്ക് ചെയ്തെടുക്കുക. ശേഷം നടുവിലെ റിംഗ് ശ്രദ്ധയോടെ മാറ്റിയ ശേഷം ബ്രെഡ് തണുക്കാൻ വെക്കുക.

200 g പൊടിച്ച പഞ്ചസാരയിൽ 2–4 tbsp പാലും അല്ലെങ്കിൽ നാരങ്ങാനീരും ചേർത്ത് നല്ല കട്ടിയുള്ള ഗ്ലേസ് തയ്യാറാക്കുക. ഇത് ബ്രെഡിനു മുകളിലൂടെ ഒഴിച്ചുകൊടുക്കാം. കൂടെ 30 g വറുത്ത ബദാം കഷണങ്ങളും വിതറി ഭംഗിയാക്കാം.

ഇനി ഇത് കഷ്ണങ്ങളാക്കി മുറിച്ച് എല്ലാവർക്കും വിളമ്പാം! എല്ലാവർക്കും എൻ്റെ ഹൃദയം നിറഞ്ഞ ഈസ്റ്റർ ആശംസകൾ! 🐣