ஸ்ட்ராபெர்ரி சீஸ்கேக்

280 g ஸ்ட்ராபெரியை சிறு துண்டுகளாக நறுக்கி, அதனுடன் 130 g சர்க்கரை, 10 g சோள மாவு மற்றும் ½ tsp வெண்ணிலா எசன்ஸ் சேர்த்து கலக்கவும். மிதமான தீயில் வைத்து, கொதிக்க ஆரம்பித்ததும் தொடர்ந்து கிளறி 3–5 நிமிடங்கள் வேக வைக்கவும். பிறகு நைசாக அரைத்து, மேற்பரப்பில் படும்படி பிளாஸ்டிக் ராப் (plastic wrap) கொண்டு மூடி முழுமையாக ஆறவிடவும்.

75 g மென்மையான பட்டருடன் 60 g பொடித்த சர்க்கரை சேர்த்து, நிறம் வெளிர் நிறமாகும் வரை நன்கு அடிக்கவும். இதில் முட்டையின் மஞ்சள் கரு மற்றும் ½ tsp வெண்ணிலா எசன்ஸ் சேர்த்து மேலும் இரண்டு நிமிடங்கள் அடிக்கவும். 140 g மைதா, 30 g பாதாம் மாவு, ¼ tsp உப்பு ஆகியவற்றை கலந்து இதில் சேர்த்து பிசையவும். மாவை பிளாஸ்டிக் ராப்பில் தட்டையாக மடித்து, 30–40 நிமிடங்கள் ஃப்ரிட்ஜில் வைக்கவும்.

பிறகு மாவை உருட்டி, முன்கூட்டியே சூடாக்கப்பட்ட ஓவனில் 190°C (375°F) வெப்பநிலையில் 10–15 நிமிடங்கள் பேக் செய்து, நன்றாக ஆறவிடவும்.

ஆறிய பிஸ்கட்டை மிக்ஸியில் போட்டு தூளாக்கவும் (அல்லது ஜிப்-லாக் பையில் போட்டு சப்பாத்தி கட்டையால் நொறுக்கவும்). இதனுடன் 40 g உருக்கிய வெண்ணெயைச் சேர்த்து நன்றாகக் கலக்கவும்.

கேக் ரிங்கின் பக்கவாட்டில் எண்ணெய் தடவி, ஒரு தட்டையான பேக்கிங் தட்டின் மேல் வைக்கவும். நொறுக்கிய துகள்களில் ¾ பகுதியை ஓரங்களுக்கும், மீதி ¼ பகுதியை அடியிலும் பரப்பி, தட்டையான டம்ளர் அல்லது கிண்ணம் கொண்டு அழுத்தி சமன் செய்யவும். இதை 15–20 நிமிடங்கள் ஃப்ரிட்ஜில் வைக்கவும்.

நாம் செய்த சாஸிலிருந்து 150 g அளந்து தனியாக வைக்கவும். 600 g கிரீம் சீஸுடன் 120 g சர்க்கரை சேர்த்து மிருதுவாக கலக்கவும். ஒவ்வொரு முட்டையாக சேர்த்து கலக்க வேண்டும். பின் 1 tsp வெண்ணிலா எசன்ஸ், 150 g ஹெவி கிரீம் சேர்க்கவும். இறுதியில் அளந்து வைத்த 150 g ஸ்ட்ராபெரி சாஸையும் சேர்த்து ஒன்றாக கலக்கவும்.

குளிர்ந்த க்ரஸ்ட் மேல் இந்த ஃபில்லிங்கை ஊற்றவும். ஓவனின் கீழ் தட்டில் சூடான தண்ணீர் நிரப்பிய ஒரு பாத்திரத்தை வைக்கவும் (water bath). பிறகு கேக்கை 110°C (230°F) வெப்பநிலையில் 100–130 நிமிடங்கள் பேக் செய்யவும். நடுப்பகுதி லேசாக ஆடும் பக்குவத்தில் (slight jiggle) இருக்க வேண்டும்.

ஓவனை அணைத்துவிட்டு கேக்கை உள்ளேயே ஆறவிடவும். ஆறியதும் பிளாஸ்டிக் ராப் கொண்டு மூடி, இரவு முழுவதும் ஃப்ரிட்ஜில் வைக்கவும். அடுத்த நாள் கேக் ரிங்கை கவனமாக எடுக்கவும். கேக் துண்டுகளின் மேல் மீதமுள்ள ஸ்ட்ராபெரி சாஸை ஊற்றி பரிமாறவும்.