चॉकलेट चीझकेक

75 g मऊ बटर आणि 60 g पिठीसाखर हलके आणि फ्लफी होईपर्यंत फेटून घ्या. त्यात अंड्याचा पिवळा बलक घालून अजून 2 मिनिटे फेटून घ्या.

या मिश्रणात 115 g मैदा/पीठ, 20 g कोको पावडर आणि एक चिमूट मीठ चाळून घ्या, आणि एकत्र मिक्स करा.

व्हिडिओमध्ये दाखवल्याप्रमाणे पिठाचा चपटा गोळा करून क्लिंग रॅपमध्ये गुंडाळा आणि 30–40 मिनिटे फ्रिजमध्ये ठेवा.

दोन बटर पेपरच्या मध्ये पीठ लाटून घ्या, नंतर काट्या चमच्याने (fork) टोचे मारा. प्रीहीट केलेल्या ओव्हनमध्ये 190°C (375°F) वर 10–15 मिनिटे बेक करा. पूर्ण गार होऊ द्या.

गार झालेला क्रस्ट मिक्सरमध्ये किंवा हाताने बारीक करून चुरा करा. त्यात 35 g मऊ बटर घाला आणि छान एकत्र येईपर्यंत मिक्स करा.

फॉइल पेपरचे तीन तुकडे आणि रिंगपेक्षा किंचित मोठा बटर पेपर घ्या. रिंगच्या बाजूने व्यवस्थित गुंडाळून कडा बंद करा. केक सहज बाहेर यावा म्हणून कडांना बटर छान लावून घ्या.

रिंगच्या कडांसाठी ¾ चुरा आणि तळासाठी ¼ चुरा वापरा. एका सपाट तळाच्या पेल्याने दाबून एकसारखा लेयर तयार करा.

क्रस्ट 15–20 मिनिटे फ्रिजमध्ये ठेवा. त्यानंतर 180°C (350°F) वर 10 मिनिटे बेक करा आणि पूर्णपणे गार होऊ द्या.

600 g क्रीम चीझ (रूम टेम्परेचर) आणि 80 g साखर एकत्र फेटून घ्या. नंतर एका वेळी एक अशी 2 अंडी घालून मिक्स करा. 120 g हेवी क्रीम गरम करून 50 g चॉकलेटवर ओता. छान मिक्स करून हे गॅनाश मुख्य मिश्रणात घाला.

गार झालेल्या क्रस्टवर हे मिश्रण ओता आणि 110°C (230°F) वर 90–120 मिनिटे बेक करा. ओव्हनच्या तळाशी एका भांड्यात गरम पाणी नक्की ठेवा.

ओव्हन बंद करून केक आतच थंड होऊ द्या, नंतर प्लास्टिक रॅप लावून रात्रभर फ्रिजमध्ये ठेवा.

120 g साखर मध्यम आचेवर वितळवून घ्या, गुठळ्या मोडत सतत हलवा, साखर वितळून छान डार्क रंग येईपर्यंत होऊ द्या.

यात 50 g फ्रोझन बटरचे तुकडे टाका आणि वितळलेल्या साखरेत मिक्स करा. मग 80 g गरम क्रीम घालून एकत्र करा.

गॅसवरून उतरवून त्यात ¼ tsp मीठ घाला आणि गाळणीने गाळून एका बाऊलमध्ये काढा.

चीझकेक रिंगमधून हळूच मोकळा करा. त्यावर 90 g भाजलेले शेंगदाणे पसरवा आणि पाईपिंग बॅग किंवा चमच्याने सॉल्टेड कॅरमल ओता.