പമ്പ്കിൻ പൈ

ആദ്യം തന്നെ മത്തങ്ങ റെഡിയാക്കാം. മത്തങ്ങ തൊലി കളഞ്ഞ് കുരു നീക്കി മീഡിയം കഷണങ്ങളാക്കി മുറിച്ച് 800 g അളന്നെടുക്കുക. ഒരു പാത്രത്തിൽ ആവശ്യത്തിന് വെള്ളമൊഴിച്ച് ഈ കഷണങ്ങൾ വേവിക്കാൻ വെക്കുക. തിളച്ചതിനു ശേഷം തീ ഇടത്തരം ആക്കി 45 മിനിറ്റ് മത്തങ്ങ നന്നായി വെന്ത് മൃദുവാകുന്നതുവരെ വേവിക്കുക. വെള്ളം പൂർണ്ണമായും ഊറ്റിക്കളഞ്ഞ് മത്തങ്ങ തണുക്കാൻ വെക്കുക.

ഒരു വലിയ ബൗളിൽ തണുത്ത മത്തങ്ങ, 150 g പഞ്ചസാര, 100 g ഹെവി ക്രീം, 1 tbsp കോൺഫ്ലോർ, 1 tsp കറുവാപ്പട്ട പൊടിച്ചത്, ¼ tsp ഇഞ്ചിപ്പൊടി, ¼ tsp ജാതിക്ക പൊടിച്ചത്, ¼ tsp ഉപ്പ് എന്നിവ ചേർക്കുക. ഒപ്പം 3 മുട്ടയും ചേർത്ത് ഒരു ബ്ലെൻഡർ ഉപയോഗിച്ച് നല്ല സ്മൂത്തായി അരച്ചെടുക്കുക.

200 g പൊടി അരിച്ചെടുത്ത് അതിലേക്ക് 30 g പഞ്ചസാരയും ¼ tsp ഉപ്പും ചേർത്ത് നന്നായി ഇളക്കുക. ഇതിലേക്ക് 100 g തണുത്ത ബട്ടർ ഗ്രേറ്റ് ചെയ്ത് ചേർത്ത് വിരലുകൾ കൊണ്ട് നന്നായി തിരുമ്മി റൊട്ടിപ്പൊടി പരുവത്തിലാക്കുക. 70 g തണുത്ത വെള്ളത്തിൽ വാനില ചേർത്ത് ഈ മാവിലേക്ക് ഒഴിച്ച് കുഴച്ച് ഉരുളയാക്കുക (കൂടുതൽ കുഴക്കരുത്). ഇത് പ്ലാസ്റ്റിക് റാപ്പിൽ പൊതിഞ്ഞ് അല്പം പരത്തി 40 മിനിറ്റ് ഫ്രിഡ്ജിൽ വെക്കുക.

ഫ്രിഡ്ജിൽ നിന്നും എടുത്ത മാവ് കുറച്ചു പൊടി വിതറിയ പ്രതലത്തിൽ വെച്ച് പൈ ഡിഷിനേക്കാൾ അല്പം വലിയ വട്ടത്തിൽ പരത്തിയെടുക്കുക. ബട്ടർ തേച്ച പൈ ഡിഷിലേക്ക് ഇത് ഇറക്കി വെച്ച് വശങ്ങളിൽ അമർത്തി ഒട്ടിക്കുക. അധികം വരുന്ന മാവ് മുറിച്ചു മാറ്റുക. ശേഷം ഇത് ഡിഷോടെ 20 മിനിറ്റ് ഫ്രീസറിൽ വെച്ച് തണുപ്പിക്കുക.

ഫ്രീസറിൽ നിന്ന് എടുത്ത ക്രസ്റ്റിലേക്ക് പമ്പ്കിൻ ഫില്ലിംഗ് ഒഴിച്ച് സ്പാറ്റുല വെച്ച് മുകൾഭാഗം ലെവൽ ചെയ്യുക. 180°C (350°F) ൽ പ്രീഹീറ്റ് ചെയ്ത അവ്നിൽ 50–60 മിനിറ്റ് ബേക്ക് ചെയ്തെടുക്കുക. ബേക്ക് ചെയ്ത പൈ പൂർണ്ണമായും തണുക്കാൻ അനുവദിക്കുക.

ഒരു മിക്സർ ഉപയോഗിച്ച് 350 g നല്ല തണുത്ത ഹെവി ക്രീമും 60 g പൊടിച്ച പഞ്ചസാരയും അടിക്കുക. കുറഞ്ഞ സ്പീഡിൽ തുടങ്ങി പതുക്കെ സ്പീഡ് കൂട്ടുക. 3–5 മിനിറ്റ് അടിച്ച് ക്രീം നല്ല കട്ടിയാകുന്നതുവരെ (stiff peaks) വിപ്പ് ചെയ്യുക. ഈ വിപ്പ്ഡ് ക്രീം ഒരു സ്റ്റാർ നോസിലുള്ള പൈപ്പിംഗ് ബാഗിലാക്കി തണുത്ത പൈയുടെ മുകളിൽ ഭംഗിയായി പൈപ്പ് ചെയ്ത് അലങ്കരിക്കുക.