Sobasız Şokoladlı Çizkeyk

160 q quru şokoladlı peçenyeni (mən evdə hazırlananı istifadə etdim) bağlı kulyokda oxlovla ovuntu halına gətirin. Peçenye ovuntusunu 50 q əridilmiş kərə yağı ilə yaxşıca qarışdırın.

Kənarı açılan qəlibin dibinə bişirmə kağızı sərilib, kənarlarını kərə yağı ilə bolca yağlayın. Beləliklə, çizkeyki zədələmədən qəlibdən asanlıqla çıxarmaq olacaq.

Peçenye qarışığını qəlibə tökün və düz dibli stəkanla basaraq bərabər səviyyəli əsas formalaşdırın. Kremi hazırlayana qədər soyuducuya qoyun.

Qabda 700 q krem pendiri 350 q qaymaqla qarışdırın.

350 q ağ şokoladı (su hamamında və ya mikrodalğalı sobada fasilələrlə) əridin və ½ ç. q. vanil ekstraktı ilə birlikdə kremə əlavə edin. Yaxşıca qarışdırın. Bu kremin üçdə ikisini peçenye əsasının üzərinə tökün.

60 q tünd şokoladı (su hamamında və ya mikrodalğalı sobada) əridin, qalan kremə əlavə edib bircinsli olana qədər qarışdırın. Bu şokoladlı kremi ağ qatın üzərinə tökün.

Çizkeyki tam bərkiyənə qədər, ən yaxşısı bir gecə və ya ən azı 5 saat soyuducuda saxlayın.