Çiyələkli Çizkeyk

280 q çiyələyi xırda doğrayıb 130 q şəkər tozu, 10 q qarğıdalı nişastası və ½ ç.q. vanil ekstraktı ilə qarışdırın. Vam odda, dayanmadan qarışdıraraq qaynamağa başladıqdan sonra 3–5 dəqiqə bişirin. Blenderlə pürə halına gətirin, üzərinə təmas edəcək şəkildə streç çəkin və tam soyumağa qoyun.

75 q yumşalmış kərə yağını 60 q şəkər kirşanı ilə ağarana qədər mikserlə çalın. Yumurta sarısını və ½ ç.q. vanil ekstraktını əlavə edib daha bir neçə dəqiqə çalın. 140 q un, 30 q badam unu və ¼ ç.q. duzu qarışdırıb kütləyə əlavə edin və xəmir yoğurun. Xəmiri streçə büküb yastılayın və 30–40 dəqiqə soyuducuda saxlayın.

Xəmiri yayıb əvvəlcədən 190°C (375°F) dərəcədə qızdırılmış sobada 10–15 dəqiqə bişirin. Tam soyumasını gözləyin.

Soyumuş korju blendərdə xırdalayın, yaxud ziperli torbaya qoyub oxlovla əzin. 40 q əridilmiş kərə yağını əlavə edib yaxşıca qarışdırın ki, ovuntu sıxıldıqda formasını saxlasın.

Halqa qəlibin kənarlarını duru yağla yaxşıca yağlayın və düz, istiyədavamlı bir qabın (məsələn, kənarları açılan qəlibin altlığı) üzərinə yerləşdirin. Ovuntunun ¾ hissəsini kənarlar üçün, qalan ¼ hissəsini isə alt hissə üçün istifadə edin. Dibi düz bir stəkan vasitəsilə ovuntunu kənarlara və dibə möhkəmcə sıxın. 15–20 dəqiqə soyuducuda saxlayın.

Çiyələk sousundan 150 q ayırın. Otaq temperaturunda olan 600 q krem pendiri 120 q şəkər tozu ilə qarışdırın. Yumurtaları bir-bir əlavə edin, sonra 1 ç.q. vanil ekstraktı və 150 q qaymağı qatın. Sonda 150 q çiyələk sousunu əlavə edib bircinsli kütlə alınana qədər qarışdırın.

Kremi soyumuş altlığın üzərinə tökün. Sobanın ən alt gözünə isti su ilə dolu odadavamlı qab qoyun və çizkeyki 110°C (230°F) dərəcədə 100–130 dəqiqə bişirin. Ortası yüngülcə silkələnməlidir.

Sobanı söndürün və çizkeyki sobanın içində soyumağa qoyun. Soyuduqdan sonra üzərini streçlə örtüb bir gecə soyuducuda saxlayın. Ertəsi gün halqa qəlibi səliqə ilə çıxarın. Hər dilimin üzərinə qalan çiyələk sousundan gəzdirin.