Gilaslı Şokoladlı Mini Tart

140 q un, 20 q kakao tozu və qabartma tozunu dərin bir qaba ələyin. 60 q şəkər tozu və bir çimdik duz əlavə edib qarışdırın.

Kiçik kublar şəklində doğranmış 100 q soyuq kərə yağını əlavə edin və un qarışığı ilə ovxalayıb umac halına gətirin.

Umacın üzərinə yumurtanı əlavə edib tez bir şəkildə toparlayın. Xəmir çox yumşaq və bir az yapışqan ola bilər.

Xəmiri iki bərabər hissəyə bölün. Bir hissəsini soyuducunun adi gözündə, digər hissəsini isə dondurucuda ən azı 2 saat saxlayın.

Qazana 150 q dondurulmuş gilas, 50 q şəkər tozu və 20 q qarğıdalı nişastasını tökün. Vam odda qarışdıraraq qatılaşana qədər bişirin. Sonra tam soyumağa qoyun.

Sobanı əvvəlcədən 190°C (375°F) dərəcədə qızdırın və keks (maffin) qəlibini yağlayın.

Soyuducudan çıxardığınız xəmiri 6 bərabər hissəyə bölün və qəlibin dibinə bərabər şəkildə yayın. Sonra kənarlarından bir az boşluq buraxaraq içliyi paylayın.

Dondurucudakı xəmiri sürtgəcin iri gözündən keçirib içliyin üzərinə bərabər paylayın.

Əvvəlcədən 190°C (375°F) dərəcədə qızdırılmış sobada 20–25 dəqiqə bişirin.