Limonli va Chernikali Keks

2 ta limon qobig‘ini qirg‘ichning mayda tishidan chiqaring va sharbatini siqib oling — jami 80 g sharbat kerak bo‘ladi. 200 g shakarni limon qobig‘i bilan aralashtirib, hidini chiqarishi uchun biroz tindiring.

200 g yumshagan sariyog‘ni oppoq va mayin bo‘lguncha mikserda ko‘pirtiring, so‘ng limonli shakarni qo‘shib yana yaxshilab aralashtiring.

Sariyog‘li massaga 3 ta tuxum sarig‘ini soling. 200 g un bilan 7 g qabartmani elakdan o‘tkazib soling va bir xil holga kelguncha aralashtiring.

3 ta tuxum oqini ¼ choy q. tuz bilan quyuq ko‘pik bo‘lguncha mikserda ko‘pirtiring va ehtiyotkorlik bilan xamirga qo‘shing. Oxirida 80 g limon sharbatini quyib, yaxshilab bir xil massaga keltiring.

Qolipga pergament qog‘ozi solib, yog‘lang. Xamirning bir qismini quyib, ustiga chernika mevalarini tering. Shunday qilib qatlam-qatlam qilib soling va oxirgi qavatni tekis xamir bilan yoping.

170°C (350°F) qizdirilgan duxovkada 1 soat davomida pishiring. Cho‘p tiqib ko‘rganda quruq chiqishi kerak. Keksni avval qolipida ozgina sovuting, so‘ng chiqarib, to‘liq sovitishga qo‘ying.

150 g shakar kukunini 25 g sut bilan aralashtirib, sovigan keks ustiga tekis qilib surting. Chernika, limon bo‘laklari va xohishga ko‘ra rozmarin yaproqlari bilan bezating.

Ana shunday chiroyli va nihoyatda mazali Limonli va Chernikali keks tayyor! Ustki qismi tilla rang, ichi esa mayin va mevali. 🍋🫐