Shokoladli va Funduqli Pechenye

Nachinkani oldindan tayyorlab olamiz. 240 g shokoladli pastani 12 ta teng bo'lakka bo'lib, pergament qog'oziga qandolatchilik qopchasi yoki oddiy qoshiq yordamida quyib chiqamiz. Muzlatkichga kamida 1 soatga qo'yamiz.

100 g funduqni ziplock paketiga solib, og'zini mahkam yopamiz va o'qlov bilan maydalaymiz. 280 g unni 1 choy qoshiq qabartma va ¼ choy qoshiq tuz bilan birga elakdan o'tkazamiz, so'ng maydalangan yong'oqni qo'shib aralashtiramiz.

Chuqur idishda 140 g yumshagan sariyog'ni 70 g oddiy shakar va 70 g jigarrang shakar bilan mikser yordamida aralashtiramiz. Tuxum va 1 choy qoshiq vanil ekstraktini qo'shib, bir xil holga kelguncha ko'pirtiramiz. Quruq masalliqlarni qo'shib aralashtiramiz va qo'limiz bilan xamirdan zuvala yasaymiz.

Xamirni 24 ta bo'lakka bo'lamiz (har biri taxminan 30 g) va ulardan doirachalar yasaymiz. 12 ta doirachani pergament ustiga terib, o'rtasiga muzlatilgan shokoladli bo'lakchani qo'yamiz va qolgan xamir doirachalari bilan ustini yopamiz. Chetlarni mahkam yopishtirib, tekis dumaloq shakl beramiz.

Oldindan 180°C (350°F) qizdirilgan gaz pechida 15 daqiqa, chetlari yengil qizarguncha pishiramiz. Ko'p ushlab yubormang. Pechenyelarni to'liq sovutamiz.

50 g sutli shokoladni eritamiz (men issiq suv idishi ustiga likopcha qo'yib eritaman) — bu miqdor 6 dona pechenye uchun yetadi. Shokoladni pechenyelar ustiga surtib, maydalangan funduq sepamiz va qotishini kutamiz.