Pista va Oq Shokoladli Pechenye

Chuqur idishda 100 g xona haroratidagi sariyogʻ, 100 g jigarrang shakar, 50 g oq shakar, 1 dona tuxum va ½ choy qoshiq vanil ekstraktini aralashtiring. Tezroq boʻlishi uchun mikserdan foydalaning yoki qoʻlda bir xil krem holatiga kelgunicha yaxshilab aralashtiring.

240 g un, ½ choy qoshiq qabartma va ¼ choy qoshiq tuzni elakdan oʻtkazib soling va bir xil xamir hosil boʻlguncha aralashtiring.

70 g oq shokoladni mayda boʻlaklarga boʻling. Uni 70 g pista va 100 g quritilgan klyukva bilan birga xamirga qoʻshing va hamma joyiga teng tarqalguncha aralashtiring.

Xamirni 8 ta teng boʻlakka (har biri taxminan 95–100 g) boʻling va dumaloq shakl bering. Pishiriq qogʻozi toʻshalgan listga bir-biridan oraliq qoldirib tering va kaftingiz bilan biroz bosing.

Oldindan 180°C (350°F) qizdirilgan gaz pechida 12–15 daqiqa, usti biroz qizarguncha pishiring. Pechenyelarni panjara ustida sovuting.

30 g pistani maydalang va 70 g oq shokoladni eriting (men shokoladli idishni issiq suv solingan boshqa idish ustiga qoʻyib eritaman). Eritilgan shokoladni pechenyalar ustiga surting va maydalangan pista seping. Dasturxonga tortishdan oldin shokolad qotishini kuting.

Ana, pista va oq shokoladli ajoyib pechenyelaringiz tayyor! Ular juda chiroyli koʻrinadi, mazasi esa shunchaki beqiyos — choy, qahva bilan ichishga yoki sovgʻa qilishga ayni muddao. 💛