Shokoladli Chizkeyk

75 g yumshatilgan sariyog‘ni 60 g shakar kukuni bilan oppoq va mayin holatga kelgunicha mikserda ko‘pirtiring. Tuxum sarig‘ini qo‘shib, yana bir necha daqiqa ko‘pirtirishda davom eting.

Ustidan 115 g un, 20 g kakao kukuni va bir chimdim tuzni elakdan o‘tkazing va bir xil massa bo‘lguncha aralashtiring.

Xamirni oziq-ovqat plyonkasiga o‘rab, videoda ko‘rsatilgandek yassi shakl bering va 30–40 daqiqaga muzlatkichga qo‘ying.

Xamirni ikkita pishiriq qog‘ozi orasida yoying va sanchqi bilan teshib chiqing. 190°C (375°F) gacha qizdirilgan duxovkada 10–15 daqiqa davomida pishirib oling. Xona haroratida sovuting.

Sovigan korjni blenderda maydalab uvoq holiga keltiring. Ustiga 35 g yumshatilgan sariyog‘ qo‘shib, bir-biriga yopishadigan holga kelguncha yaxshilab aralashtiring.

Uch qavat folgadan asos qiling va halqadan biroz kattaroq pishiriq qog‘ozini kesib oling. Ularni halqaga o‘rab, chetlarini teislang va yon devorlarini hosil qiling. Tayyor chizkeyk oson ajralishi uchun chetlariga sariyog‘ surtib chiqing.

Uvoqlarning ¾ qismidan qolip devorlarini, qolgan ¼ qismidan esa tagini hosil qiling. Tag qismi tekis bo‘lgan stakan yordamida yaxshilab zichlang.

Asosni 15–20 daqiqaga muzlatkichga qo‘ying. So‘ngra 180°C (350°F) haroratda 10 daqiqa pishirib oling va to‘liq sovuting.

600 g xona haroratidagi krem-chizni 80 g shakar bilan aralashtiring. So‘ngra 2 ta tuxumni bittalab qo‘shing. 120 g qaymoqni qizdirib, 50 g shokolad ustiga quying. Yaxshilab aralashtirib, asosiy massaga qo‘shing.

Tayyor kremni sovigan asos ustiga quying va 110°C (230°F) da 90–120 daqiqa pishiring. Duxovkaning eng pastki qismiga issiq suv solingan idish qo‘yishni unutmang.

Chizkeykni o‘chirilgan duxovka ichida sovuting, so‘ng oziq-ovqat plyonkasi bilan yopib, kechasi bilan muzlatkichda qoldiring.

120 g shakarni o‘rtacha olovda, to‘xtovsiz aralashtirib, eriting. Shakarning barcha bo‘lakchalari erib, to‘qroq tusga kirishi kerak.

Bo‘laklangan 50 g muzdek sariyog‘ni soling va shakar bilan to‘liq aralashguncha aralashtiring. 80 g qaynoq qaymoqni quyib, yana aralashtiring.

Karamelni olovdan oling, ¼ choy qoshiq tuz qo‘shing va suzgichdan o‘tkazib, toza idishga quying.

Chizkeykni qolipdan ehtiyotkorlik bilan ajratib oling. Ustiga 90 g qovurilgan yerong‘oqni tering va konditer qopchasi yoki qoshiq yordamida karamelni quying.