Olchali Chizkeyk

75 g yumshatilgan sariyog'ni 50 g shakar kukuni bilan oppoq va mayin massa bo'lguncha ko'pirtiring. Tuxum sarig'i va vanilin qo'shib, yana bir necha daqiqa ko'pirtirishda davom eting.

135 g elangan un va bir chimdim tuzni aralashmaga solib, yaxshilab aralashtiring.

Tayyor xamirni oziq-ovqat plyonkasiga o'rang, videodagidek yassi shakl berib, muzlatgichda 30–40 daqiqaga qoldiring.

Xamirni muzlatgichdan olib, ikki varaq pergament qog'ozi orasida yoying, so'ng ustini sanchqi bilan teshib chiqing.

Oldindan 190°C (375°F) gacha qizdirilgan duxovkada 10–15 daqiqa pishirib oling. To'liq sovuting.

Sovugan korjni blender yoki qo'l yordamida mayda uvoq holiga keltiring. Uvoqqa 35 g yumshoq sariyog' qo'shib, bir-biriga yopishadigan massa bo'lguncha aralashtiring.

Qolipni tayyorlab olamiz. Qolip tagiga uch qavat folga va diametridan biroz kattaroq pergament qog'ozi qo'yib, atroflarini mahkam o'rang.

Chizkeyk oson ajralib chiqishi uchun qolip devorlariga sariyog' surtib chiqing.

Uvoqning ¾ qismi bilan chizkeykning chetlarini, ¼ qismi bilan esa tagini shakllantiring. Tag qismi tekis bo'lgan stakan bilan zichlab chiqing.

Asosni 15–20 daqiqaga muzlatgichga qo'ying. Keyin 180°C (350°F) haroratda 10 daqiqa pishirib, to'liq sovuting.

Idishda 200 g muzlatilgan olcha, 100 g shakar va 15 g kraxmalni aralashtiring. O'rtacha olovda quyulguncha qaynating.

Olchali nachinkani to'liq sovutib, qandolatchilik qopchasiga soling.

Xona haroratidagi 600 g krem-pishloq va 130 g shakarni aralashtiring. So'ng 2 ta tuxumni bittalab qo'shing, ketidan vanilin va 100 g qaymoq soling.

Kremni sovugan asos ustiga quying va ustiga olchali nachinkani aylanma qilib soling. Cho'pcha yordamida chiroyli naqsh chizing.

110°C (230°F) haroratda 90–120 daqiqa davomida pishiring. Duxovkaning eng pastki qismiga albatta qaynoq suv solingan idish qo'yishni unutmang.

Chizkeykni o'chirilgan duxovka ichida sovuting, so'ng ustini plyonka bilan yopib, kechasi bilan muzlatgichda qoldiring.

Ertasiga chizkeykni ehtiyotkorlik bilan qolipdan ajratib oling. Endi uy sharoitida tayyorlangan ajoyib va mazali Olchali chizkeykdan bahramand bo'lishingiz mumkin!