Biskota me Limon të Buta e të Çara

Fillimisht, përgatisni lëkurën dhe lëngun e limonit. Grini lëkurën e limonit në rende të imët, pastaj shtrydhni lëngun në një enë më vete.

Tani përgatisim brumin e biskotave. Rrihni 75 g gjalpë të butë me 60 g sheqer pluhur për 5 minuta derisa masa të bëhet e bardhë dhe kremoze.

Shtoni vezën, ½ lç vanilje, lëkurën e limonit dhe 20 g lëng limoni dhe filloni t'i rrihni me shpejtësi të ulët të mikserit. Vazhdoni ta rrihni edhe nëse duket sikur masa nuk po lidhet menjëherë :) Rriheni derisa të bëhet një masë e trashë dhe homogjene.

Në një enë tjetër, përzieni 140 g miell, shafranin e Indisë, pluhurin pjekës dhe kripën. Sitni këtë përzierje te masa kryesore dhe trazojini mirë derisa të bashkohen.

Mbështilleni brumin e përgatitur me qese kuzhine (celefon), duke i dhënë një formë të sheshtë si në video, dhe lëreni në frigorifer për 1–2 orë derisa të ngurtësohet mirë.

Ngroheni furrën paraprakisht në 180°C (350°F) dhe shtroni tavën me letër pjekjeje.

Nxirreni brumin nga frigoriferi dhe ndajeni në 14 pjesë nga 25 g secila. Formoni toptha me duar dhe vendosini përsëri në frigorifer për 10–15 minuta.

Nxirrini topthat nga frigoriferi. Hidhni sheqer pluhur në një tas dhe kalojeni çdo topth aty duke e lyer mirë nga të gjitha anët. Renditini në tavë me distancë nga njëri-tjetri.

Piqini në furrë të ngrohur paraprakisht në 180°C (350°F) për 10–12 minuta, derisa anët e biskotave të marrin një ngjyrë të lehtë të artë.