Чоколаден чизкејк без печење

Скршете 160 g суви чоколадни бисквити (јас користев домашни) во трошки со помош на сукало во кесичка за замрзнување. Измешајте ги трошките со 50 g растопен путер додека убаво не се соединат.

Обложете го дното на калапот со хартија за печење, а страните добро намачкајте ги со путер. Така колачот ќе излезе совршено и без да се оштети.

Истурете ја смесата од бисквити во калапот и рамномерно набијте ја со чаша со рамно дно. Ставете го калапот во фрижидер додека го правите кремот.

Во сад за матење измешајте 700 g крем сирење со 350 g слатка павлака.

Растопете 350 g бело чоколадо (на пареа или во микробранова на кратки интервали) и додајте го во смесата заедно со ½ лажичка екстракт од ванила. Сè убаво измешајте. Две третини од оваа смеса прелијте ја врз подлогата.

Растопете 60 g темно чоколадо (на пареа или во микробранова печка), додајте го во остатокот од кремот и убаво соединете. Овој чоколаден слој прелијте го врз белиот слој.

Оставете го чизкејкот во фрижидер целосно да се стегне, најдобро преку ноќ или најмалку 5 часа.