Чизкејк со јагоди

Исечкајте 280 g јагоди на мали парчиња и измешајте ги со 130 g шеќер, 10 g густин и ½ лажичка екстракт од ванила. Гответе на тивок оган, мешајќи постојано, околу 3–5 минути откако ќе зоврие. Изблендирајте додека не стане мазно, покријте со проѕирна фолија директно допирајќи ја површината и оставете целосно да се излади.

Изматете 75 g омекнат путер со 60 g шеќер во прав додека смесата не побели. Додајте ја жолчката и ½ лажичка екстракт од ванила и матете уште неколку минути. Измешајте 140 g брашно, 30 g бадемово брашно и ¼ лажичка сол, додајте ги во смесата и соединете со шпатула. Завиткајте го тестото во фолија, сплескајте го малку и оставете го во фрижидер 30–40 минути.

Расукајте го тестото и печете во претходно загреана рерна на 190°C (375°F) околу 10–15 минути. Оставете го целосно да се излади.

Изладената кора сомелете ја во сечко или блендер, или ставете ја во кесичка и иситнете ја со сукало. Растопете 40 g путер и убаво измешајте го со трошките додека не почне да се формира смеса.

Богато премачкајте ги страните на обрачот со масло и поставете го врз рамна подлога отпорна на топлина — јас го користам дното од калап за торта. Искористете ¾ од трошките за да ги обложите страните, а останатата ¼ за дното. Притиснете ја смесата убаво на страните со чаша со рамно дно. Оставете во фрижидер 15–20 минути.

Одвојте 150 g од сосот од јагоди. Измешајте 600 g крем сирење на собна температура со 120 g шеќер. Додавајте ги јајцата едно по едно, па измешајте 1 лажичка екстракт од ванила и 150 g слатка павлака. На крајот додајте ги оние 150 g сос од јагоди и мешајте додека смесата не се изедначи.

Истурете го кремот врз оладената подлога. На најдолната решетка во рерната ставете сад со топла вода (за пареа) и печете го чизкејкот на 110°C (230°F) околу 100–130 минути. Средината треба благо да се тресе.

Исклучете ја рерната и оставете го чизкејкот внатре полека да се олади. Откако ќе се олади, покријте со фолија и оставете го во фрижидер преку ноќ. Следниот ден, внимателно извадете го обрачот. Прелијте го секое парче со преостанатиот сос од јагоди.