Мейіз қосылған кекс

Үлкен ыдысқа жуылған 320 г мейізді салып, үстіне қайнаған су құйып, жұмсаруы үшін 15 минутқа қалдырыңыз. Осы уақытта басқа ыдысқа 320 г ұнды, 1 шай қ. қопсытқышты және ½ шай қ. тұзды елеп салып, жақсылап араластырыңыз.

Мейіздің суын сүзгіш арқылы ағызып, содан кейін ұн қоспасына қосыңыз. Мейіздің сыртына ұн біркелкі жағылуы үшін жақсылап араластырыңыз.

Шұңғыл ыдыста жұмсартылған 220 г сары майды крем тәрізді біртекті болғанша 5–7 минут бойы миксермен шайқаңыз. Шайқауды тоқтатпай, біртіндеп 220 г қант қосыңыз және қоспа ағарып, көлемі ұлғайып, үлпілдек болғанша тағы 5–7 минуттай соға түсіңіз.

Бөлек ыдыста бөлме температурасындағы 4 жұмыртқаны 1 шай қ. ваниль сығындысымен біркелкі болғанша жеңіл шайқап алыңыз. Үздіксіз шайқай отырып, жұмыртқа қоспасын сары майға аз-аздан қосыңыз. Қоспа үлпілдек болып шығуы керек.

Барлығы жақсылап біріккенше шайқауды жалғастырыңыз. Содан кейін ұн мен мейіз қоспасын салып, қамырды біркелкі болғанша арнайы қалақшамен (лопатка) ақырын ғана араластырыңыз.

Пісіруге арналған қалыпқа өсімдік майын жағып, пергамент қағазын төсеңіз. Қамырды қалыпқа салып, бетін тегістеңіз.

Алдын ала 180°C (350°F) дейін қыздырылған пеште 55–60 минут пісіріңіз. Дайындығын ортасына ағаш таяқша (тіс шұқығыш) сұғып тексеріңіз, ол құрғақ шығуы керек.

Кексті қалыбында 10–15 минуттай суытып алыңыз, содан кейін торға түсіріп, толық суытыңыз. Ұсақ сүзгіш арқылы бетіне қант ұнтағын біркелкі себіңіз.