Классикалық чизкейк

Негізін дайындаймыз. 75 г жұмсарған сары майды 50 г қант ұнтағымен, жұмыртқаның сарысымен, тұзбен және ванильмен масса ағарғанша араластырамыз. Үстіне 135 г ұнды елекпен өткізіп, жылдам қамыр илейміз. Қамыр қолдың қызуымен жылып кетпеуі керек. Тағамдық үлдірге (пленкаға) орап, жайып, 1 сағатқа тоңазытқышқа саламыз.

Қамырды екі пергамент қағазының ортасында жайып, шанышқымен тесеміз. 190°C (375°F) қызуда 10–15 минут пісіріп, суытамыз.

Қалыпты дайындап аламыз. Мен 18 см (7 in) кондитерлік сақинаны қолдандым, шешілмелі қалып та жарайды. Дайын чизкейк оңай шығуы үшін қалыптың жан-жағын сары маймен жақсылап майлаймыз.

Суыған коржды блендермен немесе оқтаумен ұнтақтап, 35 г жұмсарған сары май қосып араластырамыз. Түбі тегіс стақанның көмегімен чизкейктің түбі мен ернеулерін түзейміз.

Негізін 180°C (350°F) қызуда 10 минут пісіріп алып, тоңазытқышқа салып суытамыз.

Бөлме температурасындағы 600 г крем-сырға 130 г қант қосып араластырамыз, содан соң 2 жұмыртқаны кезекпен қосып, ваниль және 150 г майлы кілегейді құямыз. Дайын массаны суыған негіздің үстіне құйып, бетін тегістейміз.

110°C (230°F) қызуда 90–120 минут пісіреміз. Духовканың ең астына қайнап тұрған су құйылған таба қоямыз. Піскен чизкейктің ортасы аздап былқылдап тұруы керек. Чизкейкті өшірілген духовканың ішінде қалдырып суытамыз, сосын бетін тағамдық пленкамен жауып, түнге тоңазытқышқа қоямыз.

Джемді дайындаймыз. 300 г құлпынайды турап, 100 г қант пен 20 г жүгері крахмалын саламыз. Үнемі араластыра отырып, қайнауға дейін жеткіземіз, масса біршама қоюланады. Блендермен біркелкі болғанша еземіз. Бетіне тағамдық пленканы тығыздап жауып (контакт), түнге тоңазытқышқа саламыз.

Келесі күні чизкейкті қалыптан абайлап шығарамыз. Джемді араластырып, кондитерлік қапшықпен немесе қасықпен чизкейктің бетіне әдемілеп жағамыз.