მარწყვის ჩიზქეიქი

დაჭერით 280 გ მარწყვი პატარა ნაჭრებად და შეურიეთ 130 გ შაქარი, 10 გ სიმინდის სახამებელი და ½ ჩ. კ. ვანილის ექსტრაქტი. ხარშეთ დაბალ ცეცხლზე განუწყვეტელი მორევით, წამოდუღებიდან 3–5 წუთის განმავლობაში. დააბლენდერეთ ერთგვაროვანი მასის მიღებამდე, გადააფარეთ საკვები ცელოფანი პირდაპირ ზედაპირზე (კონტაქტურად) და ბოლომდე გააგრილეთ.

ათქვიფეთ 75 გ დარბილებული კარაქი და 60 გ შაქრის პუდრა გათეთრებამდე. დაუმატეთ კვერცხის გული, ½ ჩ. კ. ვანილის ექსტრაქტი და თქვიფეთ კიდევ ორიოდე წუთი. შეურიეთ 140 გ ფქვილი, 30 გ ნუშის ფქვილი და ¼ ჩ. კ. მარილი, დაამატეთ მასას და შეკარით ცომი. გაახვიეთ ცელოფანში, ოდნავ გააბრტყელეთ და შედგით მაცივარში 30–40 წუთით.

გააბრტყელეთ ცომი და გამოაცხვეთ 190°C (375°F) გახურებულ ღუმელში 10–15 წუთის განმავლობაში. აცადეთ ბოლომდე გაციება.

გაციებული ფირფიტა დააფქვიეთ ბლენდერში ან ჩაყარეთ ზიპ-პაკეტში და დაფშქვენით გასაბრტყელებლით. გაადნეთ 40 გ კარაქი და შეურიეთ ნაფხვენებს, სანამ მასა ერთმანეთს არ შეიკრავს.

საკონდიტრო რგოლს გვერდებზე წაუსვით ცხიმი და დადგით ბრტყელ, ცეცხლგამძლე ზედაპირზე — მე ჩასაკეტი ფორმის ძირს ვიყენებ. ნაფხვენების ¾ გამოიყენეთ გვერდების ამოსაყვანად, ხოლო დარჩენილი ¼ — ძირისთვის. გვერდები კარგად დაპრესეთ ბრტყელძირიანი ჭიქით. შედგით მაცივარში 15–20 წუთით.

გადაზომეთ 150 გ მარწყვის სოუსი. 600 გ ოთახის ტემპერატურის კრემ-ყველი შეურიეთ 120 გ შაქარს. სათითაოდ შეათქვიფეთ კვერცხები, შემდეგ შეურიეთ 1 ჩ. კ. ვანილის ექსტრაქტი და 150 გ ცხიმიანი ნაღები. ბოლოს დაამატეთ 150 გ გაგრილებული მარწყვის სოუსი და კარგად მოურიეთ.

შიგთავსი გადაიტანეთ გაციებულ ძირზე. ღუმელის ქვედა დონეზე მოათავსეთ ცხელი წყლით სავსე საცხობი ჭურჭელი და გამოაცხვეთ ჩიზქეიქი 110°C (230°F) ტემპერატურაზე 100–130 წუთის განმავლობაში. ცენტრი ოდნავ უნდა ირხეოდეს.

გამორთეთ ღუმელი და დატოვეთ ჩიზქეიქი შიგნით სრულ გაციებამდე. შემდეგ გადააფარეთ სამზარეულოს პარკი და დატოვეთ მაცივარში მთელი ღამით. მეორე დღეს ფრთხილად მოხსენით ფორმა. თითოეულ ნაჭერს მოასხით დარჩენილი მარწყვის სოუსი.