თაფლის ჩიზქეიქი შაქრის გარეშე

100 გ დარბილებული კარაქი, 80 გ თაფლი და კვერცხის გული ათქვიფეთ გათეთრებამდე და ჰაეროვანი მასის მიღებამდე. ჩააცერით 200 გ ფქვილი ½ ჩ.კ. გამაფხვიერებელთან და მწიკვ მარილთან ერთად, შემდეგ შეურიეთ. შეახვიეთ საკვებ ცელოფანში, ოდნავ გააბრტყელეთ და შედგით მაცივარში 1 საათით.

ცომი გააბრტყელეთ ორ საცხობ ქაღალდს შორის და ჩანგლით დაჩხვლიტეთ. გამოაცხვეთ წინასწარ გახურებულ ღუმელში 190°C (375°F) ტემპერატურაზე 10–15 წუთის განმავლობაში. აცადეთ გაციება.

გაციებული ფირფიტა დააქუცმაცეთ წვრილ ნაფხვენებად, დაამატეთ 35 გ დარბილებული კარაქი და კარგად გადაურიეთ.

18 სმ (7 in) საცხობ რგოლს გვერდებზე უხვად წაუსვით კარაქი, რომ მზა ჩიზქეიქი მარტივად ამოვიდეს. ბრტყელძირიანი ჭიქის დახმარებით ამოიყვანეთ ძირი და გვერდები.

🔹 დეტალური ვიდეო საცხობი რგოლის მომზადების შესახებ:

https://youtu.be/Lvuwh0OepUo?t=68

გამოაცხვეთ ძირი 10 წუთის განმავლობაში 180°C (350°F) ტემპერატურაზე, შემდეგ შედგით მაცივარში გასაციებლად.

ოთახის ტემპერატურის 600 გ კრემ-ყველს შეურიეთ 150 გ თაფლი, შემდეგ სათითაოდ დაამატეთ 2 კვერცხი და ბოლოს 80 გ ნაღები. გადაიტანეთ მიღებული მასა გაციებულ ძირზე და მოუსწორეთ ზედაპირი.

აცხვეთ 90–120 წუთის განმავლობაში 110°C (230°F) ტემპერატურაზე. ღუმელის ქვედა დონეზე მოათავსეთ ჭურჭელი ადუღებული წყლით.

დატოვეთ ჩიზქეიქი გამორთულ ღუმელში გასაგრილებლად, შემდეგ გადააფარეთ საკვები ცელოფანი და შედგით მაცივარში მთელი ღამით.

მეორე დღეს ფრთხილად მოხსენით რგოლი ან ფორმა. სუფრასთან მიტანის წინ მოასხით ცოტაოდენი თაფლი.